पुणे : अपघातात ‘ब्रेनडेड’ झालेल्या एका ४० वर्षीय महिलेच्या हृदयाचे यशस्वीरीत्या प्रत्यारोपण करून मुंबईतील एका महिलेचे प्राण वाचवण्यात डॉक्टरांना यश आले आहे. पिंपरी चिंचवड येथील आदित्य बिर्ला हॉस्पिटलमध्ये अवयव काढण्याची शस्त्रक्रिया पार पडली. मृत महिलेचे यकृत आणि दोन मूत्रपिंडे तिघांना दिल्याने त्यांना जीवदान मिळाले.
पिंपरीतील एका ४० वर्षीय महिलेचा नुकताच अपघात झाला. त्या अपघातात तिच्या मेंदूला जबर मार लागला. उपचारांसाठी तिला रुग्णालयात दाखल केले होते. डॉक्टरांनी ती ‘ब्रेन डेड’ झाल्याचे निदान केले. त्यानंतर तिच्या नातेवाइकांनी तिच्या अवयवांचे दान करण्याचा निर्णय घेतला. मुंबईतील एका ४२ वर्षीय महिलेला कार्डिओमायोपॅथी नावाचा आजार झाला होता. तिला हृदयाची गरज होती. पुण्यातील ब्रेनडेड महिलेच्या आणि मुंबईतील महिलेच्या रक्तगटांची तपासणी करण्यात आली. दोघींचे रक्तगट जुळल्याने मृत महिलेचे हृदय काढण्याची शस्त्रक्रिया पुण्यातील आदित्य बिर्ला हॉस्पिटलच्या डॉक्टरांकडून करण्यात आली.
मग हृदय लवकरात लवकर मुंबईला पाठवणे गरजेचे होते. त्यासाठी ‘ग्रीन कॉरिडॉर’ आला. त्यामुळे वाकडमधून पाच वाजून पाच मिनिटांनी हृदय घेऊन निघालेली रुग्णवाहिका पाच वाजून ३५ मिनिटांनी लोहगाव विमानतळावर पोहोचली. मग चार्टर्ड विमानाद्वारे हृदय मुंबईला पाठवण्यात आले. त्यानंर संबंधित महिलेवर प्रत्यारोपणाची शस्त्रक्रिया करण्यात आली.
त्यानंतर मृत महिलेची मूत्रपिंडे आणि यकृत ‘ग्रीन कॉरिडॉर’च्या मदतीने रात्री उशिरा पुण्यातील रुबी हॉस्पिटलमध्ये आणण्यात आले. त्यांच्या प्रत्यारोपणाची शस्त्रक्रिया रात्री उशिरापर्यंत सुरू होती.
मृत महिलेच्या नातेवाइकांनी कठीण प्रसंगीही धीराने विचार करून अवयवदानाचा निर्णय घेतल्याने तिघांना जीवदान मिळाले.
